ចិន៖ ប្រធានាធិបតីបារាំង លោក Emmanuel Macron បានជំរុញឱ្យប្រធានាធិបតីចិន Xi Jinping លើកឡើងនូវហេតុផលទៅកាន់សម្ព័ន្ធមិត្តរបស់ខ្លួនគឺរុស្សី ក្នុងគោលបំណងបញ្ចប់សង្គ្រាមជាមួយអ៊ុយក្រែន ខណៈលោក Xi បានឆ្លើយតបវិញថា លោកសង្ឃឹមថាភាគីទាំងពីរនឹងអាចធ្វើការចរចាស្វែងរកដំណោះស្រាយសន្តិភាពឆាប់បំផុតតាមដែលអាចធ្វើបាន។ 

ក្នុងជំនួបពិភាក្សាដែលត្រូវបានឃ្លាំមើលយ៉ាងយកចិត្តទុកដាក់ពីពិភពលោក ប្រធានាធិបតីបារាំងបានលើកឡើងថាលោកខាងលិចត្រូវតែចូលរួមជាមួយទីក្រុងប៉េកាំង ដើម្បីជួយបញ្ចប់វិបត្តិ និងទប់ស្កាត់ភាពតានតឹងដែលកំពុងមានការរីករាលដាល ដែលអាចបំបែកមហាអំណាចពិភពលោកទៅជាប្លុកនៃសង្រ្គាម។ លោកនិយាយថា លោកជឿជាក់លើចិនថានឹងអាចនាំយករុស្សី​មករកសភាពដើមវិញ ជាពិសេសអាចនាំយកគ្រប់ភាគីចូលមកកាន់តុចរចា។ 

ដោយឡែក មតិនៅក្រោយកិច្ចប្រជុំរបស់លោក Xi បាននិយាយថា លោកនឹងព្យាយាមជំរុញឱ្យរុស្សី និងអ៊ុយក្រែនឱ្យបន្តកិច្ចចរចាសន្តិភាព និងស្វែងរកដំណោះស្រាយផ្នែកនយោបាយដើម្បីដោះស្រាយវិបត្តិនេះ។ ភាគីបារាំងបានហៅជំនួបពិភាក្សាក្នុងប្រទេសចិននៅពេលនេះថាជាជំនួបដែលមានភាពស្មោះត្រង់ និងមានស្មារតីស្ថាបនា ខណៈចិនបានពិពណ៌នាជំនួបនេះថាប្រកបដោយភារតភាព និងស៊ីជម្រៅ។ 

បន្ថែមពីនេះ លោក Macron ក៏​បាន​ស្នើ​ឲ្យ​លោក Xi ជំរុញ​រុស្ស៊ី​ឲ្យ​គោរព​តាម​ច្បាប់​អន្តរជាតិ​ស្តីពី​ការ​មិន​រីកសាយភាយ​អាវុធ​នុយក្លេអ៊ែរ។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា លោកនឹងដាក់ពង្រាយអាវុធនុយក្លេអ៊ែរយុទ្ធសាស្ត្រ នៅក្នុងប្រទេសបេឡារុស្ស ដែលជាប្រទេសនៅក្បែរខាងអ៊ុយក្រែន ដែលជាទង្វើមួយដែលត្រូវបានគេមើលឃើញថាជាការកើនឡើងដ៏គ្រោះថ្នាក់នៅក្នុងជម្លោះដ៏តានតឹងរយៈពេលជាងមួយឆ្នាំកន្លងមក។

ឆ្លើយតបនឹងការលើកឡើងនេះ លោក Xi បាននិយាយថា ប្រទេសទាំងអស់គួរតែគោរពការប្តេជ្ញាចិត្តលើការមិនប្រើប្រាស់អាវុធនុយក្លេអ៊ែរ ហើយសង្រ្គាមនុយក្លេអ៊ែរមិនគួរឱ្យកើតមាននោះឡើយ ដោយលោកមិននិយាយសំដៅឆ្ពោះតែទៅលើប្រទេសរុស្សីតែមួយនោះទេ។ លោក​បាន​អំពាវនាវ​ដល់​សហគមន៍​អន្តរជាតិ​ឲ្យ​ចៀសវាង​សកម្មភាព​ណា​មួយ​ដែល​នាំ​ឲ្យ​វិបត្តិ​កាន់តែ​យ៉ាប់យ៉ឺន​បន្ថែម​ទៀត ឬ​ក៏សកម្មភាពណាមួយដែលអាចជំរុញឱ្យស្ថានការណ៍អាចនឹងគ្រប់គ្រងលែងបាន៕